SUV SOHASIDA XALQARO HAMKORLIKNING YANGI BOSQICHI BOSHLANDI

Suv sohasida barqaror rivojlanish markazi hamda Stokgolm xalqaro suv instituti (SIWI) o‘rtasida Anglashuv memorandumi imzolandi.

Mazkur hujjat O‘zbekistonda suv resurslarini boshqarish, suvdan barqaror va samarali foydalanish hamda institutsional salohiyatni mustahkamlashga qaratilgan qo‘shma loyihalar va tashabbuslarni amalga oshirish uchun hamkorlik asoslarini belgilaydi.

Hamkorlikning asosiy yo‘nalishlari:

🔹 suv va iqlim diplomatiyasini rivojlantirish;
🔹 transchegaraviy suv hamkorligini mustahkamlash;
🔹 suv resurslarini boshqarish tizimini takomillashtirish;
🔹 iqlim o‘zgarishiga moslashuv va chidamlilikni oshirish;
🔹 suvdan barqaror va samarali foydalanish;
🔹 nizolarning oldini olish va umumiy suv resurslarini hamkorlikda boshqarish.

Memorandum doirasida davlat xizmatchilari, soha mutaxassislari, yosh tadqiqotchilar va talabalar uchun o‘quv kurslari, malaka oshirish dasturlari, yozgi maktablar, seminarlar va o‘quv tashriflarini tashkil etish ko‘zda tutilgan.

Shuningdek, tomonlar qo‘shma tadqiqotlar olib borish, bilim va tajriba almashish, ilmiy nashrlar tayyorlash, konferensiyalar, davra suhbatlari hamda siyosiy muloqotlarni o‘tkazish bo‘yicha hamkorlik qiladi.